Japanese nadiskubreng nakabigti
Kinilala ang nasawing dayuhan na si Chiba Soichi, nanunuluyan sa Room 507 ng naturang hotel na matatagpuan sa Jorge Bocobo St., sa Malate, Maynila. File
MANILA, Philippines — Nakabigti at wala nang buhay nang madiskubre ang isang 34-anyos na Japanese national sa loob ng inokupahan nitong silid sa Manor Hotel, sa Malate, Maynila, kamakalawa nghapon.
Kinilala ang nasawing dayuhan na si Chiba Soichi, nanunuluyan sa Room 507 ng naturang hotel na matatagpuan sa Jorge Bocobo St., sa Malate, Maynila
Sa ulat ni SPO3 Jonathan Bautista ng Manila Police District-Homicide Section, dakong alas-12:10 ng hapon ng Biyernes nang madiskubre ng hotel staff ang biktima na nakabigti ang leeg gamit ang nylon cord na itinali sa door knob ng banyo.
Maaari umanong lasing ang biktima bago isagawa ang pagpapakamatay dahil sa nakitang tatlong malalaking bote ng beer na nasa mesa nito.
Maayos naman ang kaniyang silid na indikasyong walang naganap na karahasan na kinasasangkutan ng iba bukod sa sarili.
Sa rekord ng hotel, ang biktima ay nagcheck-in sa pagdating nito sa bansa noong Nobyembre 2, at nakatakda sanang umalis ng bansa nitong nakalipas na Nobyembre 4 subalit pinalawig pa umano ang pamamalagi sa bansa ng labing-tatlo pang araw.
Sa salaysay ng housekeeper na si Chona Concepcion, 69-anyos, ipinalinis pa ng dayuhan ang kaniyang unit at iniwan na rin ang susi nito sa front desk.
Nang araw ding iyon, kinatok ang silid niya para sa check-out time subalit hindi na ito sumasagot kaya kumuha ng duplicate key at binuksan ni Concepcion kasama ang house detective at doon nadiskubre ang nakabigting biktima.
Palaisipan pa rin hanggang sa ngayon sa pulisya ang motibo ng biktima sa kanyang pagpapatiwakal.
- Latest
