MRT-3, tumirik ng dalawang beses
MANILA, Philippines — Sa kabila ng pagmamadali ng mga pasahero at pag-ambon na nararanasan sa Metro Manila ay walang magawa ang mga pasahero kundi bumaba ng tren makaraang dalawang beses na naman tumirik ang biyahe ng Metro Rail Transit Line 3 (MRT-3) kahapon.
Nabatid mula sa control tower ng MRT-3, unang nagpababa ng mga pasahero ang isa nilang tren sa northbound ng Ayala Station dakong alas- 10:35 ng umaga, na naulit pang muli dakong alas-12:10 ng tanghali, sa southbound naman ng Cubao Station.
Parehong technical problem ang itinuturong dahilan ng magkasunod na aberya.
Ayon sa MRT-3, umabot ng Category 3 ang status ng naturang aberya na nangangahulugang inalis ang tren sa loob ng walang kapalit.
Wala namang nagawa ang mga pinababang pasahero kung hindi maghintay at sumakay na lamang ng susunod na tren upang makarating sa kani-kanilang destinasyon.
Ang MRT-3, na bumibiyahe sa kahabaan ng Epifanio delos Santos Avenue (EDSA), ang siyang nag-uugnay sa North Avenue, Quezon City at Taft Avenue, Pasay City at vice versa.
- Latest