Taas-presyo sa LPG ngayon

MANILA, Philippines — Muli na namang magpapatupad ng taas-presyo sa Li­quefied Petroleum Gas (LPG) ang mga oil companies mismo ngayong araw ng Undas, Nobyembre 1.

Ito ay base sa abiso kahapon ng Petron Corporation, na kaninang alas-12:01 ng madaling araw, nagtaas ng P0.30 sa presyo kada kilo ang kanilang Gasul at Fiesta Gas.

Ito ay katumbas ng P3.30 na dagdag-presyo sa bawat 11 kilogram na tangke nito.

Bukod sa LPG, nagtaas din ng P0.20 kada litro ang ka­nilang Xtend Auto-LPG na ginagamit naman para sa mga taxi.

Inaasahang susunod na ring mag-aanunsiyo ang iba pang oil companies tulad ng Solane at Total sa kaparehong dagdag-presyo ng LPG at Auto-LPG kahit hindi pa naglalabas ng abiso ang mga ito.

Nabatid, na ang panibagong  LPG price hike ay bunsod ng pagtaas ng contract price nito sa world market.