Motorista dedo sa karnaper
MANILA, Philippines — Patay ang isang lalaking motorista nang barilin ito patalikod ng hindi pa nakikilalang karnaper saka tinangay pa ang sasakyang minamaneho ng una kamakalawa ng gabi sa Pasay City.
Inaalam pa ng pulisya ang pagkakakilanlan ng biktima, na kaagad na nasawi sanhi ng tama ng bala sa bandang likuran ng ulo buhat sa hindi pa batid na kalibre ng baril.
Sa report na natanggap ng Station Investigation and Detective Management Branch (SIDMB), Pasay City Police, naganap ang insidente alas-7:45 ng gabi sa harapan ng Express Payment Center sa Binanza St., Brgy. 189, Zone 20 ng nabanggit na lungsod.
Ayon sa pahayag ng isang nakasaksi sa insidente, nasa loob aniya siya ng Express Payment Center nang makarinig ng putok ng baril sa labas.
Nabatid sa saksi, isang lalaki ang umano’y nakita nitong lumabas mula sa likod ng isang sasakyan at nagtungo sa harapan (drivers side) ng isang Toyota Innova at hinatak palabas ang duguang biktima, bago sumakay at itinakas ang sasakyan patungo sa hindi mabatid na direksiyon.
Sa teyorya ng pulisya, posibleng karnaper ang suspect, na nasa loob na o pasahero na bumaril sa biktima na tumangay ng naturang sasakyan. Sa ngayon ay nagsasagawa pa ng imbestigasyon ang pulisya hinggil sa insidente.
- Latest