Ilang lugar sa Metro, sarado simula Nob. 11
MANILA, Philippines — Muling pinaalala-hanan ng Metro Manila Development Authority (MMDA) ang mga motorista, na simula sa Nobyembre 11 ng taong kasalukuyan ay sarado ang ilang lugar sa Metro Manila para sa ika- 31st Association of Southeast Asian Nations (ASEAN) Summit na gaganapin sa bansa.
Sa abiso ng MMDA kahapon, simula alas-10:00 ng gabi ng Nobyembre 11 ay ipatutupad ang lockdown sa SMX Convention Center sa Pasay City.
Kinabukasan, Nobyembre 12 ang buong CCP Complex ay sarado sa mga motorista at pedestrians.
Samantala, simula naman ng alas-12:01 ng madaling araw hanggang alas-12:00 ng hapon ng Nobyembre 13 magpapatupad ng lockdown sa Roxas Boulevard mula Buendia Avenue hanggang P. Burgos, kung kaya’t ipinagbabawal na dumaan ang anumang uri ng behikulo at dumaan na lamang sila sa mga alternatibong ruta.
Bukod dito, simula ng Nobyembre 11 hanggang 15, ang lahat trucks at closed vans ay hindi pinapayagang bumagtas sa kahabaan ng SCTEX, NLEX, mula Clark hanggang Balintawak at EDSA , mula Balintawak hanggang Magallanes, Makati City.
Asahan aniyang ma-kakaranas ng pagsisikip ng daloy ng trapiko ang mga motorista sa ilang kalye sa Metro Manila.
Dahil dito, nauna nang inanunsiyo ng pamahalaan base sa rekomindasyon ng MMDA, na suspendido ang eskuwela sa Metro Manila ng isang linggo.
- Latest
