Jeepney operator, driver itinumba!
MANILA, Philippines — Sa gitna ng kainitan sa isyu ng “jeepney modernization” ng gobyerno, isang jeepney operator at driver nito ang pinagbabaril hanggang na mapatay ng riding-in-tandem habang abala sila sa pagkukumpuni ng pampasaherong dyip sa Brgy. Concepcion Dos, Marikina City kahapon ng madaling araw.
Kinilala ang nasawing operator na si Candido Siarot, 55, ng Purok Uno, Zone 8, Cupang, Antipolo City at driver na si Roberto Cadacio alyas ‘Muslim,’ ng Cogeo, Antipolo City.
Hindi pa kilala ang dalawang suspek na hinihinalang hired killers na mabilis na tumakas matapos ang krimen, sakay ng hindi naplakahang motorsiklo.
Sa ulat ng Marikina City Police, dakong ala-1:00 ng madaling araw habang abala ang dalawang biktima sa pagkukumpuni ng pampasaherong jeepney sa Waco Street, kanto ng Panorama Street sa Barangay Concepcion Dos nang dumating ang dalawang suspek na magkaangkas sa isang motorsiklo. Bumaba ang backrider ng motorsiko at nilapitan ang mga biktima at walang sabi-sabing pinagbabaril.
Isa namang alyas ‘Romy’ ang itinuturing ng mga awtoridad na “person of interest” sa krimen na umano’y nakaalitan ni Siarot.
Sinabi ni Erlinda Ocampo, 27, manugang ni Siarot, sa pulisya na bago naganap ang pagpatay ay nakaaway ni Siarot si Romy dahil sa kanilang trabaho. Nagbanta umano si Romy na kanyang papatayin ang naturang jeepney operator.
Nagsasagawa ngayon ng follow-up operation ang mga tauhan ng Marikina police para madakip si Romy.
- Latest