Marawi rehab ginagamit sa kotong: 2 timbog
MANILA, Philippines — Natimbog ng pulisya ang dalawang lalaking nagpapanggap na kawani ng Department of Interior and Local Government (DILG) at nanghihingi ng donasyon sa mga local official para sa rehabilitasyon ng Marawi, kamakalawa sa Makati City.
Nakakulong ngayon sa Makati City Police detention cell ang mga suspect na sina Ricardo Simbulan, 63 at Mitus Sampayan, 39, kapwa nakatira sa Brgy. Pembo ng nasabing lungsod.
Ayon kay Senior Supt. Jerry Umayao, hepe ng Makati City police alas-2:00 ng hapon nang madakip ang mga suspect sa isang entrapment operation na ikinasa ng kanyang mga tauhan sa isang pawnshop sa JP Rizal Extension, Brgy. Comembo ng naturang lungsod.
Kaugnay ito ng iniharap na reklamo ng DILG sa pamamagitan ng kanilang kinatawan na si Michael So, 42.
Napag-alamang nagpapanggap umano ang mga suspect na finance officer mula sa tanggapan ni DILG OIC Catalino Uy at nanghihingi ang mga ito ng perang donasyon sa mga local official, na gagamitin para sa Marawi City Rehabilitation Program.
Dahil dito ikinasa ang bitag laban sa dalawa kung saan sa naturang pawnshop umano ihuhulog ng kanilang biniktima ang perang donasyon, doon na rin natimbog ang mga suspect na sasampahan ng kasong swindling at extortion.
- Latest