Bantay-bayan, suspek sa pagpatay kay tserman, timbog
Ang bantay-bayan na si Christopher Calumbi na suspect sa pagpaslang sa isang brgy. chairman. (Kuha ni Boy Santos)
MANILA, Philippines — Arestado ang isang Bantay Bayan member kamakalawa matapos na iturong isa sa mga suspek sa pagpatay sa isang barangay chairman sa loob ng isang bilyaran sa Brgy. Poblacion, Mandaluyong City.
Kinilala ni Eastern Police District (EPD) Director P/Chief Supt. Romulo Sapitula ang naarestong suspek na si Christopher Calumbi, residente ng Pasig City.
Batay sa ulat ng EPD, dakong alas-7:30 ng gabi nang arestuhin ng mga operatiba ng Mandaluyong City Police, sa pangunguna ni P/Senior Inspector Virgilio Platoon, ang suspek sa loob ng isang kilalang fastfood chain sa Epifanio delos Santos Avenue (EDSA, kanto ng Boni MRT Station.
Nag-ugat ang pag-aresto nang isang eye witness ang makapagsabi sa pulisya na ang suspek ay isa sa mga posibleng pumatay kay Brgy. Poblacion Chairman Godofredo Tolentino noong Oktubre 13 sa loob ng isang bilyaran sa Amado T. Reyes Street, sa Brgy. Poblacion.
Kaugnay nito, pinaghahanap pa ng mga awtoridad ang isang di pa pinangalanang suspek na siya umanong mastermind sa krimen.
- Latest
