MRT-3, tatlong beses tumirik

MANILA, Philippines — Tatlong beses tumirik at nakaranas ng aberya sa biyahe ng Metro Rail Transit Line 3 (MRT-3) kahapon ng umaga na muling ikinadismaya ng maraming pasahero.

Nabatid na pinababa ang mga pasahero sa Boni station southbound ng alas-5:22 ng umaga bunsod ng technical problem. Pinasakay na lang sa kasunod na tren ang mga apektadong pasahero.

Dakong alas-8:20 naman ng umaga nang maitala ang ikalawang aberya sa MRT. Pinababa rin ang mga pasahero sa Shaw Blvd. station southbound dahil sa nagkaproblema din na tren.

Hinatak pabalik ng MRT-3 depot sa North Avenue, Quezon City ang dalawang tumirik na bagon para muling isaayos.

Ang ikatlong aberya ay naganap dakong alas-3:16 ng hapon sa North Avenue makaraang masira ang signalling system at makitang bitak sa riles.

Ang MRT-3 ay bumibiyahe sa kahabaan ng Edsa muna sa North Aveneu, Quezon City patungo ng Taft Avenue, Pasay City at vice versa.