13-anyos binatilyo itinumba ng tandem
MANILA, Philippines — Dead-on-the-spot ang isang 13-anyos na binatilyo na hinihinalang napagkamalan lamang matapos itong pagbabarilin ng riding-in-tandem sa Pasay City kamakalwa ng hapon.
Sanhi ng dalawang tama ng bala sa ulo buhat sa kalibre .45 baril, hindi na umabot nang buhay nang idating sa isang ospital ang biktimang si Jayross Brondial.
Blanko pa ang pulisya sa pagkakakilanlan ng mga suspek at nagsasagawa pa ng follow-up hinggil sa insidente.
Sa report ng Pasay City Police, naganap ang insidente alas-3:00 ng hapon sa labas ng bahay ng biktima sa panulukan ng Tramo at Inocencio Sts., Brgy. 104 ng naturang siyudad.
Sa kuha ng CCTV ng barangay, nabatid na nakaupo ang binatilyo sa labas ng kanilang bahay nang biglang sumulpot ang isang motorsiklong hindi naplakahan at sakay ang mga suspek at agad na pinagbabaril ang binatilyo.
Nagawa pa nitong makapaglakad ng ilang hakbang bago ito tumumba, na muli itong pinutukan ng mga suspek at pagkatapos ay mabilis na nagsitakas.
Ayon sa ilang saksi, posibleng biktima ng “mistaken identity” o napagkamalan lamang ito ng mga gunmen na sangkot droga.
Dahil kamakailan, bago ang pamamaril ng mga suspek, may mga pinaghahanap at pinagpaplanuhang itumba ang mga ito na ilang tulak at gumagamit ng droga sa naturang lugar, na nagtatago dahil sa labis na takot.
Na-recover ng pulisya ang anim na basyo ng bala ng kalibre .45 baril sa pinangyarihan at patuloy na nagsasagawa ng imbestigasyon hinggil dito.
- Latest