Taxi driver na ‘hinoldap’ nina Carl, ‘Kulot’, suspect na rin
MANILA, Philippines — Bunsod ng pabago-bagong pahayag, isinama na sa listahan ni Justice Secretary Vitaliano Aguirre II bilang primary suspect si Tomas Bagcal, ang taxi driver na nagsabing hinoldap umano siya nina Carl Angelo Arnaiz at Reynaldo de Guzman, alyas Kulot bago napatay ng mga pulis.
Ayon kay Aguirre sinampahan ng kaso si Bagcal matapos nitong baguhin ang kanyang naunang pahayag at sabihing kutsilyo ang ginamit nina Arnaiz at De Guzman sa panghoholdap.
Unang sinabi ni Bagcal na may dala umanong baril si Arnaiz ng gabing mapatay ito.
Nagpabago-bago ang salaysay ni Bagcal matapos lumutang ang isang bagong testigo na nakita umanong magkakasama sina Arnaiz, Kulot, Bagcal at ang mga pulis-Caloocan.
Ayon sa testigo, sakay ni Bagcal sa harapan si PO1 Jefrey Perez, at sa likod naman ng taxi ay magkatabi sina De Guzman at Arnaiz.
Ilang saglit ay nakarinig na raw ang testigo ng dalawang putok ng baril.
Nang sundan niya ang pinanggalingan ng putok, nakita niyang may nakabulagta sa damuhan at nandoon din daw si Bagcal, Pe-rez, iba pang mga pulis na nakasibilyan at mga barangay tanod.
Giit ng testigo, handa siyang magsalita at tumulong sa imbestigasyon basta’t mabibigyan siya ng seguridad.
- Latest