Magkapatid na paslit, nasagip: Ikinulong sa dog cage
MANILA, Philippines — Nailigtas ng mga tauhan ng Malabon City Police at City Social Welfare and Development Office sa pagkakakulong ang magkapatid na lalaki na may edad tatlo at limang taon, kahapon ng umaga.
Inaresto naman ng pulisya ang mga magulang ng mga paslit na sina Roberto Acosta at Joana Macalisang, na kapwa nahaharap ngayon sa kasong pagla-bag sa RA 7610 o Anti-Child Abuse Law.
Ayon kay Bong Padua, information officer ng Malabon City Hall, dakong alas-9 ng umaga nang isagawa ang rescue operation sa bahay ng mga biktima sa Lapu-Lapu Street sa Brgy. Longos. May 500 metro lamang umano ang layo ng bahay sa barangay hall.
Nabatid na kapwa malnourished na ang magkapatid nang masagip ng mga awtoridad. Natagpuan ang 5-taong gulang na bata na nakakandado sa isang maliit na dog cage habang ang kapatid na 3-anyos ay ikinulong naman sa isang maliit na kuwarto sa ikalawang palapag ng bahay.
Nang malaman ang operasyon ng mga awtoridad, nagtungo ang mga magulang na sina Acosta at Macali-sang sa tanggapan ng CSWD kung saan sila inaresto.
Nabatid na magkahiwalay na ang dalawa nang layasan ng babae ang ama ng mga bata upang sumama sa ibang lalaki. Sinabi naman ni Acosta na iniiwan niya ang mga anak sa kanyang biyenan na si Delfrado Macalisang kapag pumapasok siya sa trabaho.
Sinabi naman ni Delfrado na lumapit na siya sa mga opisyal ng kanilang barangay para matulungan ang mga bata ngunit walang aksyon umano ang mga ito. Nailigtas lamang ang mga bata nang isang concerned citizen ang humingi ng saklolo sa CSWD.
- Latest