‘Kalayaan Lanes’ ipapatupad, ngayong Kapaskuhan

MANILA, Philippines — Bunsod ng inaasahang ma­tinding trapik ngayong  panahon  ng Kapaskuhan, lumagda kahapon ng isang Memorandum of Agreement (MOA) ang pinagsanib na pwersa ng Metropolitan Manila Development Authority (MMDA) at Quezon City government  hinggil  sa ipatutupad na alternatibong ruta o tinaguriang  ‘Kalayaan Lanes’.

Sinabi ni MMDA Chairman Danilo Lim, ang ipatutupad na ‘Kalayaan Lanes’  ay makakatulong para mabawasan ang trapik sa mga pangunahing lansangan sa Kalakhang Maynila, partikular aniya sa EDSA.

Nabatid, na itatalagang ‘Kalayaan Lanes’ ang ilang lugar sa Quezon City, na siyang gagami­ting daanan o alternatibong ruta ng mga pribadong behikulo.

Ito ay ang mga lugar ng Amoranto Avenue; Balintawak Cloverleaf; Banawe St.; Biak na Bato; Congressional Avenue; Commonwealth Avenue; C-5 Road; D. Tuazon St.; Dapitan St.; De Jesus St.; Del Monte Avenue; EDSA; E. Rodriguez Avenue; Gilmore Ave­nue; Granada St.; Katipunan Avenue; Luzon Avenue; Maria Clara St.; Matimyas St.; Mayon Avenue; Mindanao Avenue; Quezon Avenue; Santolan Road; Santo Domingo Avenue; Scout Magbanua St.; Scout Tobias St.; Timog Avenue; Tomas Morato Avenue; Visayas Avenue at West Avenue.

Magtatalaga ng sapat na bilang ng mga traffic enforcer na siyang magmamantina ng daloy ng trapiko sa mga lugar na kabilang sa ‘Kalayaan Lanes”.

Katuwang dito sa pagpapa­tupad nito ang ilang ahensiya ng pamahalaan tulad ng Land Transportation Office (LTO), Land Transportation Franchising and Regulatory Board (LTFRB),  Philippine National Police (PNP) at pamahalaang lokal.

Maglalagay din ng mga  signages o karatula na gagabay sa mga motoristang dadaan sa mga tinaguriang ‘Kalayaan Lanes’.