Chinese timbog sa pagkidnap at pagpiit sa Koreano
MANILA, Philippines - Arestado sa kasong kidnapping at serious illegal detention ang isang Chinese national na isang casino financier at itinuturong mastermind sa pagdukot sa isang Korean national na kanyang piniit sa loob ng 11 araw sa Maynila.
Ayon kay P/Chief Insp. Joselito de Ocampo, hepe ng Manila Police District-General Assignment and Investigation Section (MPD-GAIS), nakatakas umano ang biktimang si Jung Jae Hoon, 39, at nanunuluyan sa Unit 2416 Le Mirage Condominium na matatagpuan sa A. Mabini St., Maynila noong Agosto 17 ng alas-7 ng gabi nang malasing ang mga nagbabantay sa kanyang mga Chinese kasama ang mastermind na si Gong Yu Jia, 28, isang Chinese casino financier, tubong Fujian China at nanunuluyan sa Pan Pacific Hotel.
Naganap umano ang pagdukot sa biktima noong Agosto 6, dakong alas-11 ng gabi matapos matalo sa casino ng Pan Pacific Hotel na matatagpuan sa Adriatico St. corner Malvar St., Ermita, Maynila.
“Humiram dun sa suspek yung Koreano ng halagang P600,000 at nang matalo yung hiniram na pera, inutusan ng suspek yung kanyang mga tauhan na idetine yung Koreano na inilipat-lipat ng lugar tapos ipinatutubos ng P4 milyon sa kanyang pamilya”, ayon kay de Ocampo.
Hindi na nagawang makapagpadala ng ransom ang pamilya ng biktima nang masuwerte itong makatakas sa mga bumihag sa kanya at nagsumbong na sa Korean Embassy saka nagreport sa pulisya. Nagtungo sa Camp Crame ang biktima para patulong kay Kwon Hyosang, Korean Desk police na naka-detail sa CIDG Camp Crame sa Quezon City na siyang nakipag koordinasyon sa MPD-GAIS.
Nagpadala pa umano ng larawan ang sindikato sa pamilya ng biktima sa Korea na nakatali ang paa at kamay at may dugo sa mukha bilang patunay na dinukot ang biktima at palalayain lamang kapag nakapagbigay ng halagang P4 milyon. Kaagad namang umaksyon ang MPD-GAIS at bumuo ng grupo para maaresto ang mga suspek at pagdating sa Pan Pacific Hotel positibong itinuro ng biktima ang suspek na noon ay nasa loob ng casino na umano’y siyang dumukot sa kanya kaya agad itong hinuli nina PO2 Dexter Dela Paz at PO3 Paul Robin Bautista pero hindi nadakip ang 10 pa niyang kasamahan.
- Latest