17-anyos patay sa Caloocan ‘One Time-Big Time’ Operation
MANILA, Philippines - Isang 17-anyos na binatilyo ang nasawi nang makipagbarilan umano sa mga operatiba na nagsagawa ng “One Time-Big Time” operation sa Caloocan City, kamakalawa ng gabi.
Ang nasawi ay kinilalang si Kian Lloyd Delos Santos, ng Block 8, Lot 28, Libis, Baesa Barangay 160, Caloocan.
Batay sa ulat, dakong alas-8:45 ng gabi ay nagsagawa ng operasyon sa Libis, Baesa, Caloocan ang mga tauhan ng Police Community Precinct at inginuso umano ng impormante ang isang lalaki na may nakasukbit na baril at pagala-gala umano sa erya ng Block 7, Riverside.
Nang puntahan ng mga pulis ay pinaputukan umano sila ng suspek kaya’t gumanti ang una at napatay ito.
Hindi naman umano target si Delos Santos sa operasyon na natiyempuhan lamang at narekober mula sa kaniya ang kalibre 45 baril at 2 plastic sachet ng shabu sa bulsa.
Beniberipika pa ng mga imbestigador ang nakalap na impormasyon hinggil sa pagiging sangkot ng biktima sa iligal na droga.
Hindi naman makapaniwala ang ama sa sinapit ng anak dahil sa paniwala na sinalvage ito matapos na makita sa CCTV footage na bitbit ito ng dalawang pulis bago binaril sa sulok.
Anya, kung totoong nanlaban ang kanyang anak bakit hindi agad nila ito binaril kung saan nila ito inaresto. Lumitaw din ang maraming testigo na hindi nanlaban ang suspek.
- Latest
