1 patay sa kotseng napisak ng cement mixer
MANILA, Philippines - Patay na ang padre de pamilya na isa sa nadaganan ng isang cement mixer truck habang sakay ito ng minamaneho nitong kotse kasama ang pamilya kamakalawa ng hapon.
Alas-7:32 kamakalawa ng gabi, idineklarang patay si Ulyses Ramos, 35, makaraang isugod sa pagamutan, ng Kingspoint Subdivision ng naturang lungsod.
Nasa pagamutan pa rin ang kanyang misis na si Marife, 35; mga anak na may edad 12, 8 at 4.
Samantala, ang driver ng mixer na si Jayson Muleta, 27, taga Phase 3, Urban Lupang Pangako, Brgy. Payatas ay nahaharap sa kasong reckless imprudence resulting to homicide, multiple physical injuries at damage to property. Nakakulong na ito sa Quezon City Traffic Sector 6.
Ayon sa inisyal na imbestigasyon ni PO3 Antonio Tabios, naganap ang insidente alas-4:30 ng hapon sa harapan ng tanggapan ng Bureau of Jail Management and Penology (BJMP) sa Mindanao Avenue, Brgy. Bahay Toro ng naturang siyudad.
Sakay ang mga biktima ng isang kulay puting Honda Brio (AOA-3301) at mag-go-grocery sana ang mga ito nang suyurin ng 16-wheeler cement mixer truck na pag-aari ng Top Star Mix Ready Concrete Inc., na ang tanggapan ay matatagpuan sa Caloocan City.
Pagkatapos ay rumampa sa center island ang mixer cement hanggang bumuwal at madaganan ang sasakyan ng mga biktima.
Umabot ng halos tatlong oras bago tuluyan nakuha sa napipi nilang sasakyan ang nasawing si Ulyses.
- Latest