300 pamilya nasunugan sa Malabon
MANILA, Philippines - Nasa 300 pamilya ang nawalan ng kanilang tirahan makaraang matupok ng malaking sunog ang isang residential area sa kabila ng pagbuhos ng ulan, kahapon ng madaling araw sa Malabon City.
Sa inisyal na ulat ng Bureau of Fire Protection (BFP), dakong alas-5:15 ng madaling araw nang sumiklab ang apoy sa may Asinto Pilapil, Dulong Herrera Street sa Brgy. Ibaba, ng naturang lungsod.
Agad namang nakaresponde ang mga bumbero kung saan umabot sa higit 10 trak ng bumbero ang nakarating ngunit nahirapan na malabanan ang apoy dahil sa hindi magkasya ang mga trak sa makikitid na eskinita at tanging maliliit na trak lamang ang nakapasok.
Dahil dito, hindi agad sumapat ang tubig na ibinobomba ng mga bumbero sa lugar na may apoy. Tumulong rin naman ang mga residente na nagkanya-kanyang salok ng tubig sa kanal at maging sa baha na isinasaboy nila sa apoy.
Dakong alas-8:22 na ng umaga nang ganap na maapula ang sunog na umabot sa ikalimang alarma. Nasa higit 100 kabahayan na pawang yari sa light material ang tuluyang natupok sa insidente.
Iniimbestigahan naman ng mga arson investigator na sa bahay ng isang Fely Decilio nagmula ang apoy makaraang mapabayaan umano ang nilulutong kaning-baboy nang makatulog ang nagbabantay.
- Latest