8 kataong inaresto sa joint session ng Kongreso, pinalaya na

MANILA, Philippines - Pinalaya na ng Quezon City Police District (QCPD) ang walo kataong inaresto matapos na manggulo sa isinasagawang special session ng Kongreso kaugnay ng pagpapalawig pa ng martial law sa loob ng House of Representatives sa Batasan Complex sa Quezon City noong nakalipas na Sabado.

Sinabi ni QCPD Director P/Chief Supt. Guillermo Lorenzo Eleazar, ang walo kataong inaresto ay  kanilang pinalaya base sa kautusan ni Judge Don Ace Mariano Alagar ng Quezon City Municipal Trial Court (MTC) Branch 43 matapos na magpiyansa ng tig P2,000 bawat isa nitong Martes.

Kinilala ang mga ito na sina Yasser Gutier­rez, 23, ng Davao City; Chad Errol, 23; Kenneth Cadiang, 23; kapwa ng Surigao del Sur; Vinzhill Simon, 22 ng Makati City; Renz Pasigpasigan, 19, ng Brgy. Cruz na Ligas; Maria Almira Abril, 20, ng Brgy. Sauyo, Novaliches; John Paul Rosos, 19, ng Brgy. Old Balara, at Michael Joselo Villanueva, 24,.

Ang mga ito ay inaresto matapos na magsisigaw habang isinasagawa ang joint session kaugnay ng pagpapalawig pa ng martial law sa Mindanao.

Nabatid na ang mga ito ay nasa loob ng session hall sa  House of Representatives nang ma-bulabog ang mga mambabatas ng magsisigaw.

“No to martial law again”, anang mga pasaway na indibidwal na inilabas pa ang kanilang mga banners.

“They will still face the criminal case of disturbance of proceedings filed against them. I hope that this will serve as a strong message to anybody, that no one is above the law, and should also serve as a lesson to the accused”, anang opisyal.