Re-routing sa SONA, inilabas ng MMDA
MANILA, Philippines - Magpapatupad ng re-routing scheme ang Metropolitan Manila Development Authority (MMDA) sa Lunes sa araw ng State of the Nation Address (SONA) ni Pangulong Rodrigo Duterte dahil sa isasara ang ilang mga kalsada.
Sa abiso kahapon ng MMDA, inaasahang makakaranas ng pagsisikip ng daloy ng trapiko sa kahabaan ng Commonwealth Avenue, LITEX, at Batasan Complex.
Kung kaya’t pinayuhan ang mga motoristang babagtas dito, na dumaan na lamang sa mga itinalagang alternatibong ruta.
Sa mga motoristang pa northbound lane, maaa-ring kumanan sa Congressional Avenue, papasok ng Mindanao Avenue, kanan ng Old Sauyo Road bago muling lumabas sa Commonwealth Avenue.
Kapag manggagaling naman sa Quezon Avenue, maaaring dumaan papasok ng North Avenue, diretso sa Mindanao Avenue at lumabas sa Commonwealth paglagpas ng Fairlane St.
Samantala sa mga pa-southbound lane na galing ng Commonwealth Avenue, maaaring kumanan sa Fairlane St., kanan uli sa Dahlia St., labas ng Old Sauyo Road, bago pumasok sa Mindanao Avenue at lalabas na ng EDSA. Ang magmumula naman sa SM Fairview at Robinson patungong Quirino Highway ay diretso lamang, na palabas ng Mindanao Avenue. Mula naman ng Fairview at Min-danao Avenue kanan sa Jordan Plains, diretso sa Quirino Highway at palabas ng Mindanao Avenue patungo sa kanilang destinasyon.
Ayon sa MMDA, isasara rin nila ang ilang bahagi ng IBP Road simula alas-12:00 ng tanghali, dahil dito dadaan ang mga mambabatas, VIP, at iba pang mga magtutungo sa pagdadausan ng SONA.
Sa tantiya ng MMDA, tinatayang nasa 10,000 militante ang magmamartsa mula Commonwealth Avenue hanggang Batasang Pambansa pagsapit ng ala-1:00 ng hapon sa mismong araw ng SONA.
Nabatid, na mas maluwag ang ipatutupad na seguridad sa kanila ngayong taon, dahil papayagan silang makalapit sa gate ng Batasan.
Samantala, tinatayang mahigit sa 6,000 pulis ang idi-deploy naman ng National Capital Region Police Office (NCRPO) para magbigay ng seguridad sa SONA ng Pangulo, ngunit hindi sila maaring magdala ng mga baril, truncheon, at batuta.
- Latest