22 huli sa drug ops sa SPD
MANILA, Philippines - Nasa 22 katao na pawang sangkot umano sa pagtutulak at paggamit ng droga ang nadakip sa magkakahiwalay na operasyon ng pulisya sa Southern Metro Manila, kamakalawa ng gabi at kahapon.
Sa report na natanggap ng Southern Police District (SPD), alas-2:30 ng madaling araw nang madakip ng mga kagawad ng Las Piñas City Police sa isang checkpoint sa Basa Compound, Brgy. Zapote ng naturang siyudad ang apat na kalalakihan matapos makuhanan ang mga ito ng isang plastic sachet ng shabu.
Nasa 10 namang kalalakihan na pawang ‘tulak’ ng droga ang nadakip ng mga tauhan ng Taguig City Police sa isang buy-bust operation sa Labao St., Brgy. Napindan ng naturang lungsod alas-3:30 ng hapon.
Alas-8:30 naman ng umaga nang madakip ng operatiba ng Makati City Police ang suspect na si Alan Comia Gutierrez, 36 sa Valdez St., Brgy. Poblacion ng naturang lungsod matapos makumpiskahan ito ng dalawang plastic sachet ng shabu.
Si Jonathan Amador, 38 ay nadakip naman nang magsagawa ng validation ang mga kagawad ng Muntinlupa City Police sa Tepaurel Compound PNR Site Brgy. Putatan ng naturang siyudad alas-4:30 ng hapon at nakuhanan ito ng dalawang plastic sachet ng shabu.
Alas-6:00 naman ng gabi nang madakip si Bernie De Amor, 24 sa Phase II, Southville 3, Brgy. Poblacion, Muntinlupa City matapos itong makuhanan ng isang plastic sachet ng shabu.
Lima namang kalalakihan na pawang tulak ng droga ang nadakip ng mga kagawad ng Pasay City Police sa isang buy-bust operation sa #250 Vergel St., Brgy. 119 ng naturang lungsod alas-8:45 ng gabi.
Nakumpiskahan ang mga ito ng shabu na ang market value ay nasa P23,000.00.
Ang mga nadakip na suspect ay sasampahan ng kasong pagbebenta at paggamit ng ipinagbabawal na gamot (Comprehensive Dangerous Drug Act of 2002).
- Latest