Miyembro ng BNG, todas sa tandem
MANILA, Philippines - Patay ang isang miyembro ng ‘Bahala na Gang matapos pagbabarilin ng riding in tandem habang naglalakad sa Sampaloc, Maynila.
Dead-on-arrival sa Ospital ng Sampaloc ang biktimang si Ian Anderson Fellosas, ng Leo St. Sampaloc, Maynila sanhi ng tama ng bala sa iba’t-ibang bahagi ng katawan habang inaalam naman ang pagkakakilanlan sa suspek na magkaangkas sa isang motorsiklo na tumakas matapos ang insidente.
Sa report ni Det. Joseph Kabigting ng Manila Police District-homicide section, dakong alas-7:00 ng gabi nang naganap ang insidente sa Mindanao Ave., Sampaloc, Manila.
Naglalakad ang biktima papunta sa isang tindahan nang buntutan siya ng mga suspek at nang makalapit ay bumunot ng baril ang kaangkas nito at sunud-sunod na pinaputukan ang una.
Patuloy naman iniimbestigahan ng pulisya kung may kinalaman sa bentahan ng ilegal na droga o personal na galit ang motibo ng pagpaslang sa biktima.
- Latest
