Karnaper, dedo sa pulis
MANILA, Philippines - Todas ang isang hinihinalang karnaper matapos mabaril ng mga tauhan ng Manila Police District (MPD) habang sakay ng kanyang ninakaw na motorsiklo sa likuran ng Manila Post Office sa may Muelle del Rio St., Ermita, Maynila.
Kinilala ang suspek na si John Estrella, 19 ng Hospicio de San Jose, Ayala Boulevard, Ermita, Maynila na namatay noon din.
Sa report ni SPO4 Jonathan Bautista ng MPD-homicide section, dakong alas-9:30 ng gabi nang magreklamo ang hindi kinilalang biktima sa Brgy. 660 Zone 71 kung saan hinoldap at kinuha umano ng suspek ang kanyang motorsiklong Yamaha Mio sa lugar sakop ng barangay.
Kaagad naman itinawag ng barangay sa Lawton PCP ang reklamo ng biktima dahilan para kaagad na magsagawa ng dragnet operation.
Nagkataon nakita ang suspek na tumutugma sa desripsiyon na ibinigay ng biktima na sakay ng inagaw na motorsiklo at mabilis na tumatakbo papuntang Mac Arthur bridge kaya hinabol ito ng mga pulis hanggang abutan sa Muelle del Rio.
Nang parahin ay agad na bumunot ng .38 kalibreng baril ang suspek at pinaputukan ang direksiyon ng pulis dahilan para gumanti ng putok ang mga ito na nagsanhi sa kamatayan ng suspect.
Nabawi sa suspek ang pitaka at motor ng biktima.
- Latest