3 patay sa drug operations
MANILA, Philippines - Tatlo na namang hinihi-nalang mga ‘‘tulak’’ ng iligal na droga ang pawang nasawi nang makipagbarilan umano sa mga pulis sa magkakahiwalay na anti-drug operation ng Caloocan City Police mula kamakalawa ng hapon hanggang madaling araw kahapon.
Nakilala ang mga nasawi na sina Ranillo Diaz, alyas Tata, 29,; Jimmy Predas Orata, alyas Jimmy Taba, 42, driver, at isang alyas Lauro, ng Brgy. 176 Bagong Silang.
Sa ulat ng Caloocan City Police, alas-12:03 ng hatinggabi nang magkasa ng buy bust operation ang mga operatiba ng DEU ng PCP 1 sa may Brgy. 86 at target na madakip ang suspek na si Orata. Matapos na maisakatuparan ang pagbili ng shabu, kumilos na ang mga nakatagong operatiba upang arestuhin ang suspek na nakahalata at agad na pinaputukan ang mga awtoridad. Dito na gumanti ang mga pulis na nagresulta sa pagkakapaslang ni Orata.
Dakong ala-1 naman ng madaling araw kahapon nang salakayin ng mga tauhan ng Drug Enforcement Unit ng Police Community Precinct 3 ang isang bahay sa Robis, Phase 4 Package 5 Brgy. 176 Bagong Silang, makaraang makatanggap na may nagaganap na pot session.
Nang makarating sa lugar, isang lalaki kaagad ang nagpaputok sa mga pulis. Gumanti ang mga awtoridad ng putok na nagresulta sa pagkakapaslang sa naturang lalaki na nakilala sa alyas Lauro. Nakatakas naman ang lima niyang kasamahan.
Alas-4 kamakalawa ng hapon nang mapaslang naman ng mga tauhan ng DEU ng PCP5 si Diaz sa isa pang buy bust operation. Nanlaban rin umano ang suspek kaya binaril at napatay ng mga pulis. Nakuha sa suspek ang isang kalbire .45 baril, tatlong napaputok na cartridge, at apat na plastic sachet ng shabu.
- Latest