Muslim sector sa Quiapo protektado ng mga residente vs Maute Group
MANILA, Philippines - Tiniyak ng mga residenteng Muslim sa Quiapo area na hindi nila papayagang mapasok ang kanilang lugar ng Maute group na iniugnay sa teroristang grupong Islamic State of Iraq and Syria (ISIS) para hindi sila madamay habang nagpapatuloy ang isinasagawang opensiba ng pwersa ng gobyerno laban sa nasabing grupo.
Sinabi ni Saanoden Hadji Rashed Naga Punut, dating barangay kagawad at treasurer ng barangay sa Quiapo, na nagmomonitor din sila sa mga taong nagtutungo sa kanilang lugar upang hin-di sila mapasok o mahaluan ng Maute members.
Mapayapa aniya, ang seleberasyon nila ng Ramadan sa Islamic Center at patuloy ang panalangin na iligtas sa nagaganap na labanan sa Marawi ang kanilang mga kapatid na muslim at kaanak.
Nagtitiwala din aniya, sila sa pangako ng Manila Police District (MPD) na sapat ang itinalagang seguridad sa kanilang lugar ngayong panahon ng Ramadan.
Gayunman, hindi pa rin umano maiaalis sa kanila ang pangamba na basta na lamang magbitbit o umaresto ng tao mula sa Islamic area, gayunman, sakali mang mangyari, dapat ay ang mga nakukuhang intelligence report ng mga awtoridad ay dumaan muna sa validation para makatiyak na hindi malalabag ang karapatan ng sinuman sa kanilang lugar.
- Latest