4 na lady bomber sa Metro, itinanggi ng NCRPO
MANILA, Philippines - Itinanggi kahapon ng pamunuan ng National Capital Regional Police Office (NCRPO) ang kumakalat sa social media (Facebook) hinggil sa apat na kababaihang mula sa Basilan na planong magpasabog sa ilang shopping malls sa Metro Manila.
Kasabay nito, ang panawagan sa publiko partikular sa mga netizen na maging responsable sa paggamit ng social media.
Ayon kay NCRPO director Oscar Albayalde ang kumakalat sa social media (Facebook) na wala naman silang natatanggap na anumang banta ng terorismo sa Metro Manila. Wala umanong dapat na ipagpanik ang publiko, dahil nanatiling normal ang sitwasyon sa Metro Manila bagamat epektibo pa rin ang heightened security dito.
Dapat umanong maging mapanuri at huwag basta-basta maniwala sa mga ‘‘bogus’’ na balita ang publiko.
Gayunpaman, tiniyak ng NCRPO ang kaligtasan ng publiko dahil higit nilang paiigtingin ang seguridad tulad nang pagtatatag ng mga checkpoint sa mga lansangan ng Metro Manila.
Muling giniit ng NCRPO, na ang naganap na magkasunod na pagsabog sa Quiapo, Maynila ay walang kaugnayan sa terorismo.
Gayunman, mas higit na pinaigting ng NCRPO ang kanilang pwersa kung saan nagdagdag sila ng bilang ng mga kapulisan sa mga matataong lugar tulad ng sa mga shopping malls at mga terminal.
- Latest
