2 traffic enforcer sinagasaan ng sinitang tricycle driver
MANILA, Philippines - Sugatan ang dalawang traffic officer ng Navotas City Traffic Management Office (CTPMO) makaraang bundulin ng isang tricycle driver habang tumatakas matapos na sitahin siya sa kawalan ng sticker ng kanyang pinapasada, kamakalawa ng hapon.
Nadakip at nahaharap ngayon sa kasong reckless imprudence resulting in double physical injuries ang suspek na si Samad Ampoan, tubong Marawi, 27, at naninirahan sa Arlegue, Quiapo, Maynila. Agad namang nalapatan ng lunas sa pagamutan ang mga nabundol na sina Traffic Enforcer na sina Ramil Arizala at Rhodora Romero, kapwa ng CTPMO.
Sa ulat ng pulisya, dakong alas-3:45 ng hapon nang unang sitahin ni Arizala si Ampoan dahil sa walang sticker ang kanyang minamanehong tricycle sa may intersection sa C4 Road Brgy. Bagumbayan North, ng nabanggit na lungsod. Inutusan ng enforcer ang suspek na itabi ang kanyang tricycle ngunit pinaharurot pa ito at mabundol sa balikat si Arizala.
Agad namang nakapagradyo si Arizala kaya tinangka namang harangin ni Romero ang tricycle sa may C4 Bus Terminal. Muli, binundol ng suspek ang traffic officer na si Romero habang nakasakay pa siya sa kanyang motorsiklo dahilan ng pinsala sa katawan.
Dito nagkaroon ng habulan hanggang sa madakip ng iba pang traffic enforcer ang suspek sa may 5th Avenue sa Caloocan City. Biniberepika na ng mga awtoridad ang papeles ng naturang tricycle upang mabatid kung karnap ito.
- Latest