P100-M shabu narekober ng NBI sa abandonadong kotse
MANILA, Philippines - Nakumpiska ng mga ahente ng National Bureau of Investigation (NBI) ang tinatayang P100 milyon halaga ng shabu sa isang abandonadong kotse sa parking lot ng isang mall, kamakalawa ng gabi sa Bacoor, Cavite.
Sa inisyal na ulat ng NBI tinatayang aabot sa 21 kilograms ng shabu ang nakuha sa compartment ng isang lumang kulay puti na abadonadong sasakyan na iniwan sa parking lot ng isang mall dakong alas-11 ng gabi.
Nakalagay umano ang shabu na nakabalot sa 21 plastic sa dalawang sports bag na nakita sa compartment ng kotse.
Kaugnay nito, nakuha naman ang susi ng kotse sa tabi ng isang gulong. Hinintay pa umano ng surveillance team ng NBI kung sino ang kukuha ng kotse pero hindi na ito lumutang kaya binuksan na ito ng NBI.
Hinala ng NBI na nakatunog ang ‘recipient’ ng droga na may mga ahente ng NBI na nakatutok sa kanila.
Patuloy naman inaalam ng NBI sa Land Transportation Office (LTO)kung kanino nakarehistro ang inabandonang sasakyan. Nalaman na isang impormante ng NBI ang nagbigay ng impormasyon kaugnay sa magaganap na abutan ng droga sa nabanggit na parking lot ng mall.
- Latest
