Implementasyon ng Anti-Distracted Driving Act, sinuspinde ng DOTr
MANILA, Philippines - Pansamantalang sinuspinde ng Department of Transportation (DOTr) ang implementasyon ng Anti-Distracted Driving Act (ADDA) na nagbabawal sa mga motorista sa paggamit ng mobile devices at electronic gadgets, habang nagmamaneho.
Ayon kay Atty. Aileen Lizada, board member at tagapagsalita ng Land Transportation Franchising and Regulatory Board (LTFRB), na nasa ilalim ng pangangasiwa ng DOTr, wala pang eksaktong petsa kung kailan sisimulang muli na ipatupad ang bagong batas.
Sa ngayon aniya ay magsasagawa na lamang muna ng information campaign ang DOTr upang higit na malinawan ang mga motorista sa mga probisyon ng ADDA.
Ang aksyon ng DOTr ay kasunod ng panawagan ng ilang senador, transport groups at mga pribadong motorista, na pansamantalang suspindihin ang batas, dahil sa nakalilitong implementing rules and regulations (IRR) nito.
Ilan sa mga kinukwestiyong probisyon ng batas ay ang pagba-ban ng mga rosaryo, pigurin at iba pang accessories sa dashboards ng sasakyan, gayundin ang paggamit ng mga navigational apps tulad ng Waze, na maaaring makasagabal sa paningin ng driver nito.
Sa ilalim ng ADDA, ang sinumang lalabag sa bagong batas ay papatawan ng multang P5,000 sa unang paglabag, P10,000 sa ikalawang paglabag, at P15,000 sa ikatlong paglabag, na may kasama pang tatlong buwang suspensiyon ng lisensya.
Sa ikaapat na paglabag naman ay maaari nang bawiin ang lisensya ng driver at pagmumultahin pa ng P20,000.
- Latest
