Kelot niresbakan, malubha sa saksak
MANILA, Philippines - Kritikal ang kalagayan ngayon ng isang binata makaraang saksakin ng isang lalaki dahil lamang sa dating alitan sa Quezon City, kahapon ng madaling araw.
Ang biktima na nakaratay ngayon sa FEU Hospital ay kinilalang si Roberto Balero y Conge, 31, binata ng 341 St. Michael St., Area 6B, Republic Ave., Brgy. Holy Spirit, QC.
Pinaghahanap naman ng otoridad ang suspek na nakilalang si Elmer Ulo, residente ng Bicol St., Republic Ave. ng naturang lugar.
Sa inisyal na ulat ni SPO2 Terixon Galuno, nangyari ang insidente sa kahabaan ng Sto. Rosario St., Creek, corner, Republic Ave. ng nasabing barangay, dakong ala-1:30 ng madaling araw.
Bago ito, dumalo umano ang biktima sa isang lamay sa nasabing lugar at habang nakatayo ang biktima at nanonood sa mga nagsusugal ng cara y cruz ay biglang dumating ang suspek at kinompronta ang biktima kaugnay sa dati nilang alitan.
Ang komprontasyon ay nauwi sa mainitang pagtatalo sa pagitan ng dalawa hanggang sa magbunot ng patalim ang suspek at tarakan sa likod ang biktima.
Matapos ang pananaksak ay mabilis na tumakas ang suspek habang ang biktima ay agad namang isinugod ng barangay sa naturang ospital.
- Latest