FEU-NRMF; Wang’s-Asia Tech nagparamdam agad sa MBL
MANILA, Philippines - Ipinarada ng nagdedepensang FEU-NRMF-Gerry’s Grill ang pinakabagong all-around player na si Fil-German Glenn Gravengard upang pabagsakin ang Victoria Sports-MLQU, 89-57 sa pagsisimula ng 2017 MBL Open basketball championship sa EAC Sports Center sa Ermita, Manila.
Agad na nagpakitang gilas ang 6-1 guard na si Gravengard, naglaro sa University of British Columbia Thunderbirds noong 2011-12, sa kanyang 18 puntos para ibigay sa FEU-NRMF ang buwenamanong panalo.
Ang 27-taong gulang na Kinesiology graduate, naging bahagi rin ng Steve Nash Fitness Clubs, ay nagbida sa second quarter kung saan umiskor siya ng 11 puntos mula sa drives at mid-range jumpers.
Ang matikas na debut ni Gravengard ay maihahantulad din sa nakabibilib na laro ng kanyang half-brother na si Clay Crellin sa MBL nung nakalipas na walong buwan.
Si Crellin, na hinirang na MVP matapos pamunuan ang FEU-NRMF sa MBL title nung Disyembre, ay nag-ambag ng 14 puntos sa kabila ng maagang foul trouble.
Si Erwin Sta. Maria ay umiskor din ng 14 puntos, kabilang ang tatlong triples, habang si ex-PBA star Jerwin Gaco ay nagdagdag ng 12 puntos para sa Tamaraws.
Samantala, sumandal ang Wang’s-Asia Tech sa dalawang pressure-packed free throws ng dating Arellano University mainstay na si Ralph Salcedo sa huling 11 segundo upang agawin ang panalo laban sa Emilio Aguinaldo College, 82-81.
- Latest