College stude, inutas ng tandem
MANILA, Philippines – Patay ang isang 20-anyos na college student nang pagbabarilin ng riding in tandem sa Caloocan City, kahapon ng madaling araw.
Sa panayam kay PCP-5 desk officer PO2 Allen Martinez, ng Caloocan City Police, nalagutan ng hininga habang ginagamot sa Dr. Jose N. Rodriguez Memorial Hospital sanhi ng mga tinamong tama ng bala sa ulo at katawan ang biktimang si Evangelo Cuya, 3rd year college student at residente ng Pili St., Brgy. 178 Camarin ng naturang lungsod.
Nagsasagawa pa ng follow-up ang pulisya para sa pagkakakilanlan ng suspect at sa ikadarakip nito.
Ayon sa imbestigasyon ng pulisya, unang nagkayayaang mag-inuman ang biktima at kanyang mga kaibigan na sina Ephram June Bolgado at Junel Ferrer sa Hang-Outs Food Park na matatagpuan sa kahabaan ng Susano Road ng naturang siyudad.
Nang matapos ang inuman ng bandang alas-2:00 ng madaling araw ay nagdesisyon na ang mga ito na umuwi.
Sakay ng kani-kanilang motorsiklo sina Bolgado at Ferrer, iniwan ng mga ito ang biktima sa panulukan ng J.P. Rizal at Lapu-Lapu Sts., Santo Niño Brgy. 178, Camarin.
Hanggang sa dumating ang mga suspect na kapwa nakasuot ng jacket at helmet habang lulan ng motorsiklong walang plaka at walang sabi-sabing pinagbabaril si Cuya.
Matapos ang insidente mabilis na tumakas ang mga suspect sa hindi matukoy na direksyon habang isinugod naman ng ilang concerned citizen ang biktima sa nasabing pagamutan, subalit binawian ng buhay habang nilalapatan ng lunas.
- Latest
