P.2-M halaga ng ari-arian, naabo sa 2 sunog sa Taguig
MANILA, Philippines – Tinatayang aabot sa P.2-M ang halaga ng mga ari-arian ang naabo sa magkahiwalay na sunog na naganap sa Taguig City, kahapon ng madaling araw.
Ayon sa Taguig City Bureau of Fire Protection (BFP), ang unang sunog ay naganap alas-3:45 ng madaling araw sa panulukan ng Roldan at MLQU Sts., Brgy. Lower Bicutan ng naturang lungsod.
Sinasabing nagmula ang sunog sa sinusunog na basura at nang mapabayaan ay kumalat ito sa ilang kabahayan.
Matapos itong respondehan ng mga bumbero at maapula ang apoy, alas-5:30 ng umaga nang ideklara itong fireout.
Ang ikalawang sunog naman ay naganap alas-4:30 ng madaling araw, na nagsimula sa isang karinderya sa Block 51, Phase 2, Brgy. Pinagsama Village, Taguig City.
Dahil dito kumalat ang apoy sa ilang kabahayan at establisimento habang inaalam pa ng mga awtoridad kung magkanong halaga ng mga ari-arian ang naabo at kung ano ang pinagmulan nang pagsiklab ng apoy.
Ayon sa Taguig City BFP, wala namang buhay na nadisgrasya sa insidente at patuloy pa nila itong iniimbestigahan.
- Latest