4-0 na ang Spurs

CEBU, Philippines - Bisan og dunay bandahe ang tuo niyang mata nga nagarasan, wala  kini makaapekto ni Kawhi Leonard ug gani nagmangtas pa siya human mipabuhagay og 14 sa iyang 27 puntos sa nahabilin nga 6:04 sa duwa aron pag-agak sa San Antonio Spurs ngadto sa 106-99 nga kadaugan batok sa Miami Heat sa 2016-2017 NBA season kagahapon didto sa American Airline Arena sa Miami, Florida.

Si Pau Gasol midugang og 20 puntos ug 11 ka rebounds, samtang si Patty Mills miamot og 18 puntos alang sa Spurs nga mikolapso human nakalabaw og 16 puntos sa first half.  Apan nakabangon ra sab dayon aron pagkulit sa ikaupat niining sagunson nga daog.

Didto sa Oklahoma City, si Russell Westbrook mitala sa ikaduha niining sunod-sunod nga triple-double sa dihang gilabhan sa Thunder ang Los Angeles Lakers, 112-96 aron pag-inat sa ilang baraha ngadto sa 3-0.

Si Westbrook mitapos og 33 puntos, 16 ka asssists ug 12 ka rebounds aron pagduyog nilang Magic Johnson, Jerry Lucas ug Oscar Robertson sa halangdong listahan sa mga players sa kasaysayan sa NBA nga naka-triple double sa unang tulo pa lamang ka duwa sa season.

Human gipakauwawan sa Spurs sa una nilang duwa, padayon ang maanindot nga pagbangon sa Golden State Warriors ug ang Phoenix Suns maoy labing uwahi nilang biktima, 106-100.

Si Kevin Durant miratsada og 37 puntos, samtang si Stephen Curry midugang og 28 puntos, apil niini ang duha ka free throws sa nahabilin nga 12.9 segundos nga maoy nagselyado sa kadaugan sa Warriors.

Nindot unta ang dagan sa duwa sa Suns nga nakalabaw pa og 13 puntos sa first half, apan ang Warriors milusad og mainit nga rally sa katapusang kuwarter ubos sa kombinasyon nilang Durant ug Curry.

Sa laing mga duwa, si James Harden milansang og usa ka free throw sa nahabilin uno segundo aron pag-aswat sa Houston Rockets ngadto sa kulbahinam nga kadaugan batok sa Dallas Mavericks, 93-92.

Sila sa Austin Rivers ug Blake Griffin nagkumboya og 37 puntos alang sa LA Clippers nga milatos sa Utah Jazz sa iskor nga  88-75, si Marc Gasol mipatuasik og 20 puntos aron pangulohan ang 112-103 nga daog sa Memphis Grizzlies batok sa Washington Wizards sud sa overtime, samtang si Andre Drummond mikamada og 20  puntos aron pagtuboy sa Detroit Pistons ngadto sa 98-83 nga kadaugan batok sa Milwaukee Bucks.   (BANAT NEWS)