Presyo ng LPG, tumaas
MANILA, Philippines – Nagpatupad kahapon ng pagtaas sa presyo ng Liquefied Petroleum Gas (LPG) ang ilang kompanya ng langis.
Ito ay pinangunahan ng Petron Corporation na nagtaas ng P2.90 kada kilo sa presyo ng Gasul at Fiesta Gas na katumbas ng P31.90 sa bawat 11 kilogram na tangke nito epektibo kahapon ng alas-6:00 ng umaga.
Bukod sa cooking gas, nagpatupad din ng pagtaas sa presyo ng Auto LPG ng P1.62 kada litro.
Nabatid kay Raffy Ledesma, ng Petron Corporation, ang pagtaas ng presyo ng kanilang LPG ay bunsod ng paggalaw ng presyo nito sa pandaigdigang pamilihan.
Inaasahang magpapatupad na rin ng pagtaas ang iba pang kompanya ng langis na may kahalintulad din ng halaga.
Huling nagpatupad ng pagtaas sa presyo ng LPG ay noong Setyembre 1 ng taong kasalukuyan.
- Latest
