Misis ng inmate posibleng pinag-ugatan ng riot sa Bilibid
MANILA, Philippines - Posibleng may kinalaman ang misis ng isa pang high profile inmate na siyang pinag-ugatan nang kaguluhan sa New Bilibid Prison (NBP) na ikinasawi ng isang preso dito at ikinasugat naman ng apat pa.
Ayon sa kampo ni Jaybee Sebastian sa pamamagitan ng abogado nitong si Atty. Eduardo Arriba, base sa ilang pahayag ng kanyang kliyente, ang isa pang presong si Tomas Donena ang sumaksak sa kanya habang nakaupo sa tumba-tumbang upuan at nanonood ng telebisyon.
Nakasaad pa sa salaysay ni Sebastian, bago naganap ang pananaksak ay lumapit sa kanya ang sugatan ring si dating Chief Inspector Clarence Dongail at Donena at pinag-usapan ang umano’y planong pagpatay sa asawa ni Dongail na si Grace.
Kung saan pinagbibintangan umano ni Dongail si Sebastian at isa pang presong si Hanz Tan ang siyang may planong ipapatay ang kanyang misis na si Grace.
“Ang sabi ko kay Major Cla-rence na total pinag-uusapan naman eto, ang totoong istorya dyan ay sinabihan ni Peter Co si Jenny na asawa ni Tony Co na sama nang sama umano sa asawa ni Dongail at sa dami ng ginagawang katarantaduhan ng asawa niyan baka gantihan si Grace’, ito ang ilan pang ibinigay na pahayag ni Sebastian.
Kung kaya’t posibleng ito ang pinag-ugatan nang ginawang pananaksak kay Sebastian at hindi aniya totoong nagpa-pot-session sina Peter Co; Tony Co at Vicente Sy na umano’y sinasabing sinita ni Dongail kung kayat nagkaroon ng riot sa buil-ding 14 ng Maximum Security Compound, NBP.
Hanggang sa ngayon ay bantay sarado pa rin ang Medical Center of Muntinlupa (MCM) kung saan dito nagpapagaling sina Sebastian; Peter Co at Vicente Sy.
- Latest