19 pang dayuhan, gumamit ng Philippine passport, nasabat

MANILA, Philippines – Nasa 19 na mga dayuhan na kinabibilangan ng Indonesians at Malaysians na nadiskubreng gumamit ng Philippine Passport para makasali sa Hajj pilgrimage sa Saudi Arabia ang hinarang sa Ninoy Aquino International Airport (NAIA)  noong nakalipas na linggo.

Matapos ang evaluation ng Bureau of Immigration, kinumpirma kahapon ni Immigration Commissioner Jaime Morente, 15 Indonesian at 4 na Malaysian ang naharang sa kabuuan.

Nabatid na 7 sa 15 Indonesian ay naharang sa NAIA Terminal 2 noong Setyembre 22, habang ang 7 iba pa ay pinigil sa NAIA terminal 1 nitong Set. 24.

Ang apat na Malaysian naman at isa pang Indonesian ay dumating sa NAIA Terminal 2 noong Sept. 25, araw ng Linggo.

Ayon sa ulat, natukoy ng BI Intelligence agents ang pagkakakilanlan ng mga Indonesian makaraang kumpirmahin ng tatlong Sheikh na sila ay bumiyahe kasama ang iba pang Indonesian na gumamit ng Filipino name at Philippine passport.

Sumailalim pa ang mga dayuhan sa pagtatanong ng inter agency task force pero kalaunan ay pinakawalan din sa mga embahada na magpoproseso ng kanilang repatriation.