Grab taxi ‘na-sandwich’ ng 3 truck: 1 patay, 2 sugatan
MANILA, Philippines – Nasawi ang isang 25-anyos na babae na umano’y pamangkin ng isang Kongresista, habang kritikal ang kaibigan nitong pasahero at sugatan din ang driver ng sinakyang Grab car makaraang maipit sa tatlong trak kahapon ng madaling araw sa nagtahan fly-over sa Sta. Mesa, Maynila.
Hindi na naisalba pa ng mga doktor sa Ospital ng Maynila ang biktimang si Ivory Agarao Abaya, casino surveillance, ng Makati City at sinasabing pamangkin ni Laguna 4th District congressman Benjamin Agarao, Jr., habang kritikal ang kaibigan nitong si Karen Graneta, 25, company nurse at on-line casino dealer. Sugatan din ang driver ng Toyota Vios na Grab taxi na may conduction sticker na YY 8918 na si Antonio Maraya, 44, dahil tinamong sugat sa iba’t ibang parte ng katawan.
Sa naunang ulat, galing umano ang magkaibigan sa Balic-Balic at patungo sa tinutuluyang condominium sa Makati City nang maipit ang kanilang sinasakyan sa karambola ng tatlo pang sasakyan kabilang ang isang 14 wheeler truck na Isuzu cargo na may plakang CXI 841 dakong alas-12:00 ng madaling araw sa southbound lane ng nagtahan Flyover sa Sta. Mesa, Maynila.
Sinabi ng driver ng trailer truck na may kargang buhangin na si Edison Gonzales, nawalan siya ng preno habang pababa ng Nagtahan Bridge, kaya’t sumalpok siya sa isa pang trak na nasa kanyang unahan, na mabilis namang dumausdos at sumalpok sa likurang bahagi ng Grab taxi na sinasakyan ng tatlong biktima.
Bumangga naman ang taxi sa nasa unahan nitong isa pang truck na nagresulta sa pagkamatay ng isa sa mga biktima at pagkasugat ng dalawa pa. Sa naturang karambola, parang lata na nayupi ang Grab taxi.
Nalaman na mahigit isang oras na naipit sa loob ng kotse ang tatlong biktima bago tuluyang naialis ng mga rumespondeng rescuer.
Hawak na ng mga awtoridad ang driver ng trailer truck na nawalan umano ng preno.
- Latest
