Vendor sa Pasig, pinatay
MANILA, Philippines – Patay ang isang vendor na sinasabing suma-side line sa pagtutulak ng droga makaraang pagbabarilin ng tatlong hindi pa nakikilalang lalaki na magkaka-angkas sa motorsiklo sa Pasig City, kahapon ng umaga.
Ang biktima ay kinilalang si Ferdinand Olarte Tuason, nasa hustong gulang, vegetable vendor na residente ng Nagpayong, Brgy. Pinagbuhatan, Pasig City.
Nabatid kay SPO1 Ricardo Allapitan na ang pagpatay sa biktima ay naganap dakong alas-5:40 ng umaga sa Georgia St. Nagpayong, Brgy. Pinagbuhatan sa lunsod.
Ayon sa report, kasalukuyang inaayos ng biktima ang kanyang panindang gulay noong dumating ang tatlong suspek na magkakaangkas sa motorsiklo at walang sabi-sabing pinagbabaril ito.
Hindi nakuha ang plaka ng motor na sinasakyan ng mga suspek at hindi rin naki-lala ang mga ito dahil pawang nakasuot ng helmet.
Sa inisyal na imbestigasyon ng Pasig police, sinasabing may kinalaman sa droga ang ginawang pagpatay sa biktima.
Nabatid na kabilang sa drug wacthlist ng Barangay Pinagbuhatan ang biktima dahil bukod sa pagtitinda niya ng gulay ay nagtutulak din umano ng droga.
Nagsasagawa pa ng masusing imbestigasyon ang pulisya para matukoy ang mga salarin at tunay na motibo ng krimen.
- Latest