Parak patay sa landlord
MANILA, Philippines - Patay ang isang pulis-Maynila nang barilin ng landlord sa inuupahan nitong boarding house sa Malate, Maynila, kahapon ng madaling araw.
Anim na bala sa likod mula sa kalibre .45 baril ang tumapos sa buhay ni PO1 Alwin Kirk Gonzales, nakatalaga sa Manila Police District- Station 9 at residente ng Malate, Maynila.
Tumakas naman ang suspek na kinilalang si Eli Matthan Sumampong, alyas Jonathan, 33, negosyante, residente ng City Land Tower I, Pablo Ocampo St., Malate, Maynila at may-ari ng inuupahang unit ng biktima.
Sa ulat ni PO3 Ryan Jay Balagtas, ng MPD-Homicide Section, dakong alas- 2:30 ng madaling araw nang maganap ang pamamaril sa hallway papasok sa kuwarto ng biktima.
Sa imbestigasyon, ang biktima ay umawat lamang sa away ng suspek at dating kinakasama nito na si Girly Espinosa hanggang sa iwan na nito ang dalawa at nagpasiyang pumasok na sa kaniyang kuwarto subalit hindi niya alam na sinundan siya ng suspek at barilin ito habang nakatalikod.
Inaalam pa ang impormasyon kung may namamagitang selos sa suspek at biktima dahil naghihinala umano na karelasyon ni Espinosa ng nasabing pulis.
Nakipag-ugnayan ang mga awtoridad sa kaanak ng suspek para sa pag-aresto.
- Latest
