Galamay ng drug lord na si Boratong, todas sa drug operation
MANILA, Philippines – Todas sa mga awtoridad ang isa sa sinasabing ‘‘galamay’’ ng drug lord na si Amin Iman Boratong na may-ari ng shabu tiangge sa Pasig City sa isinagawang buy bust operation kahapon ng madaling araw.
Ang napatay na suspek ay kinilala lamang sa alyas na Jamil, na sinasabing isa sa mga dealer ng droga ni Boratong.
Nabatid mula kay PO2 Marvin Santos ng Pasig police, ang insidente ay naganap dakong alas-12:30 ng madaling araw sa Sanglaan Compound, Brgy. Palatiw, Pasig City.
Ayon kay Santos, nagkunwari siyang bibili ng droga sa halagang 2,000 pero nakatunog umano si Jamil na pulis ang kanyang ka-transaksiyon kaya mabilis nitong binunot ang kanyang kalibre .38 baril saka kinalabit ang gatilyo habang nakatutok sa pulis pero hindi pumutok.
Nagawa namang bunutin ni Santos ang kanyang service firearms saka ipinutok sa suspek na nagresulta sa pagkamatay ng suspect. Sa rekord ng pulisya, nabatid na si Jamil ay isa mga galamay ng drug lord na si Boratong na siyang pasimuno ng pagpapakalat ng droga sa Pasig City.
Una dito ay naglabas ng drug matrix ang pamunuan ng Eastern Police District (EPD) kung saan ay si Boratong ang natukoy na lider ng sindikato ng droga sa Pasig City at mga kalapit na bayan.
- Latest
