65 kaso ng death under investigation, pinabubusisi sa Caloocan
MANILA, Philippines – Ipinag-utos kahapon ng pamunuan ng Northern Police District (NPD) sa Caloocan City Police na paigtingin ang isinasagawang imbestigasyon upang maresolba ang talamak na vigilante killings sa lungsod na umabot na sa 65 insidente mula nitong Hulyo.
Pinagpapaliwanag rin ni NPD Director, Senior Supt. Roberto Fajardo si Caloocan Police chief, Senior Supt. Johnson Almazan kung bakit wala pa sa mga kaso ng “death under inquiry” ang nareresolba hanggang ngayon.
Ang kautusan ay ginawa makaraang maging viral sa mga social networ-king sites ang lantarang pagpatay ng nasa 5-10 lalaki na nakasuot ng helmet sa tricycle driver na si Michael Young, alyas Akong, sa may Heroes Del 96, Brgy. 73, nitong Agosto 22 ng gabi.
Matapos barilin ng unang lalaki, dalawang lalaki pa ang magkasunod na lumapit sa nakabulagta nang biktima at muling pinagbabaril para matiyak na patay na ito. Pinayuko naman ng ibang kasamahan ang iba pang tricycle driver na tila nanonood lang ng eksena sa pelikula ng naturang oras. Dalawang plastic sachet na naglalaman ng hinihinalang shabu ang nakumpiska malapit sa bangkay.
Dakong alas-8:30 kamakalawa ng gabi, isa pang tricycle driver ang napatay ng mga hindi nakilalang salarin. Nakilala ang biktima na si Aries Verances, alyas “Pipoy”, 29-anyos.
- Latest
