2 pinabulagta ng tandem sa Pasig

MANILA, Philippines – Dalawang hinihinalang drug pusher ang pinagbabaril hanggang sa mapatay ng hindi pa nakikila-lang riding-in-tandem sa magkahiwalay na lugar sa Pasig City, kamakalawa ng gabi.

Ang unang insidente ay naganap dakong alas-8:30 ng gabi sa Stella Mariz St., Brgy. Maybunga, Pasig City kung saan ang napatay  ay nakilala lamang sa alyas na ‘Bimbo’. Ayon sa report, naglalakad si Bimbo sa Stella Mariz St., noong dumating ang dalawang suspek na magka-angkas sa motorsiklo na walang plaka at walang sabi-sabing pinagbabaril ang biktima.

Nagawa pang maisugod sa Pasig City Medical Center ang biktima pero hindi na umabot ng buhay dahil sa dalawang tama ng bala ng hindi pa batid na kalibre ng baril sa katawan.

Ang ikalawang insidente ay naganap dakong alas-10:15 ng gabi sa  Magsaysay St., Barangay Manggahan sa lungsod at ang biktima ay nakilala lamang sa pangalang ‘Marlon’. Sinasabing kapwa nakasuot ng bonnet ang dalawang salarin  kaya hindi namukhaan ng mga nakasaksi sa insidente.

Ang dalawang napatay ay sinasabing ‘tulak’ ng droga sa kanilang lugar.