3 todas sa Parañaque, Taguig
MANILA, Philippines – Patay ang tatlong katao kabilang ang isang babae na sangkot umano sa ipinagbabawal na gamot matapos pagbabarilin ang mga ito sa magkakahiwalay na insidente sa Parañaque at Taguig City, kamakalawa.
Binawian ng buhay habang nilalapatan ng lunas sa Ospital ng Parañaque ang biktimang si Elma Santos, 34, ng Brgy. San Dionisio, Parañaque City, nagtamo ito ng ilang tama ng bala sa iba’t ibang bahagi ng katawan buhat sa kalibre .9mm. Alas-3:00 ng hapon nang pagbabarilin si Santos ng pusher na si alyas Umlim habang bumibili ang babae rito ng shabu dahil kulang umano ang pera nito sa ilalim ng overpass sa kahabaan ng Ninoy Aquino Avenue, Brgy. La Huerta ng naturang lungsod.
Sa Parañaque City pa rin, dead-on-the-spot si Abduljalil Amama “alias Charlie Muslim”, 30, nakatira sa Unida St., Brgy. Baclaran ng naturang lungsod matapos itong makipagbarilan sa mga kagawad ng Parañaque City Police sa pamumuno ni Police Inspector Arlan Perez sa isang anti-drug operation sa bakanteng lote sa panulukan ng Opeña at Mactan St. ng nabanggit na barangay, alas-9:10 ng gabi.
Sa Taguig City naman, pinagbabaril at pinatay ang umano’y drug pusher at miyembro ng “akyat bahay gang” na si Reil Dagayloan, may sapat na gulang ng hindi pa nakikilalang suspect.
Alas-2:00 kahapon ng madaling araw nang pagbabarilin si Dagayloan sa Staging Area, Sitio Maliwanag, Brgy. Western Bicutan ng naturang lungsod.
- Latest
