Rider may kargang droga, utas sa pulis
MANILA, Philippines - Patay ang isang hindi pa nakikilalang rider makaraang makipagbarilan sa mga pulis kamakalawa ng madaling araw sa Caloocan City.
Patuloy na inaalam pa ng pulisya ang pagkakakilanlan sa nasawing suspek na nasa 5’4” ang taas, nasa 20-25 anyos ang edad, at nakasuot ng itim na jacket at bonnet.
Sa ulat ng Caloocan City Police North Extension Office (NEO), nagsasagawa ng pagpapatrulya ang kanilang Anti-Carnapping Unit nang maispatan ang suspek sakay ng isang walang plakang motorsiklo sa may Waling-Waling Street, Sampaguita Subdivision, Brgy. 175, dakong ala-1:50 ng madaling araw.
Tinangkang parahin ng mga pulis ang suspek ngunit bigla umano nitong pinaputukan ang mga awtoridad na gumanti naman nang pagpapaputok na nagresulta sa pagkasawi nito.
Nakuha sa posesyon ng suspek ang isang calibre .38 baril na may limang bala at isang maliit na bag na may lamang dalawang plastic sachet ng hinihinalang shabu.
- Latest