Bebot, tinadyakan, sinuntok ng brgy. kagawad
MANILA, Philippines – Pormal nang inihain sa Manila Police District-General Investigation and Investigation Section (MPD-GAIS) ang reklamong slight physical injury at unjust vexation ng isang 20-anyos na babae laban sa barangay kagawad na sumipa umano sa kaniyang hita at nanuntok sa dibdib, na naganap noon pang Mayo 20, 2016.
Ang pagsasampa ng kaso ay bunsod ng kabiguan na maayos sa barangay level ang reklamo at isyuhan ng certificate to file action ang biktimang si Catherine Guinto, kitchen staff sa Chowking-Waltermart branch at residente ng no. 2549 Granate St., San Andres Bukid, Maynila laban kay Brgy. Kagawad Arnel Bugayong Sr., 60, ng Brgy. 766, Zone 83 at residente ng 2552 Granate St. San Andres Bukid.
Sa imbestigasyon, inihatid lamang ng biktima sa bahay ang anak ng suspek na si Joanna Bugayong, 30, na kasama niya at iba pang kaibigan sa Herran bar na hindi naman kalayuan sa kanilang lugar.
Matapos umano ang inuman ay pinakiusapan ni Joanna ang biktima na ihatid siya sa bahay upang hindi paghinalaan ng mga magulang na may iba pa silang kasama.
Sa labas pa lamang umano ng bahay ng suspek ay nagsisigaw na ang ina ni Joanna at pinagalitan ang biktima kung bakit nito isinasama ang kaniyang anak sa pag-inom ng alak.
Nang lumabas naman ang suspek ay may hawak itong pamalo at nang hahatawin na umano ang biktma ay inawat ng misis subalit nakalapit pa rin kaya natadyakan umano sa hita ang biktima at sinuntok pa umano sa dibdib.
- Latest
