Drug supplier concert timbog sa NBI
MANILA, Philippines – Naaresto na ng mga ahente ng National Bureau of Investigation (NBI) ang isang 35 anyos na ‘tulak’ umano ng iba’t ibang uri ng iligal na droga, kabilang ang sinasabing ‘party drugs’ na pinaniniwalaang sanhi ng pagkamatay ng 5 katao na dumalo sa “Close Up Forever Summer” open field party sa Mall of Asia, sa Pasay City noong Mayo 21, 2016.
Sa isinagawang press conference kahapon na pinangunahan ni NBI-Anti-Illegal Drugs Division chief, Atty. Joel Tovera, inihayag nito ang pagkaka-aresto kay Joshua Habalo, alyas ‘Josh’, isang event organizer, dakong alas 2:00 ng madaling araw nitong Sabado (Mayo 28) sa isang event sa House of Manila club, sa Remington Hotel, sa Pasay City
Isa umanong entrapment operation ang isinagawa laban sa suspek, na nagbenta sa ahente ng NBI na nagpanggap na party attendee ng ecstacy sa halagang P1,500 ang isa.
“Matagal din bago siya lumutang kasi may strategy pa siya na wala siya sa nasabing party, pero alam namin na naroon lang siya at nang lumutang na siya pasado alas 2:00 na, alas-11:00 pa lang ng gabi ang transaksiyon sa kaniya,” ani Tovera.
Nakuha din sa kaniyang pag-iingat ang ilan pang ecsracy tablets na kulay pink, sachets ng cocaine at kulay green na kapsula na ang hitsura ay tulad ng pinaghihinalaang ginamit ng ilang kataong namatay sa nasabing concert na tinatawag na “green amore”.
“Yung mga nakuha naming ebidensiya, may mga label na at mukhang may nakalaang pagbebentahan ,” ani Tovera.
Nilinaw ni Tovera na bigtime peddler si Habalo subalit hindi siya ang ‘source’ ng mga iligal na droga kundi may amo o sindikatong suplayer ito.
Madali umano nilang nakilala si Habalo dahil noong taong 2014 ay naaresto na rin nila ito sa kasong iligal na droga.
Umamin si Habalo na may kakilala siyang dumalo sa Close Up Forever Summer concert kaya siya ay naroon din sa event at high sa ecstacy subalit itinanggi na nagbenta siya doon ng iligal na droga.
Ayon kay Tovera, patuloy sila sa pagtugis sa mga suspek na ikinanta ni Habalo. May 10 grupo umano ng sindikato ng droga na nagbenta sa mga concert goers
Pinag-aaralan din ng NBI ang ilang inconsistency sa mga pahayag ni Habalo.
Samantala, bigo ang NBI na makontak ang mga nakuhang pangalan ng mga suspek dahil hindi na umano sumasagot ang mga ito.
- Latest