Lalaki tinodas habang nagbabasketbol
MANILA, Philippines - Hindi na natapos ng isang lalaki ang paglalaro niya ng basketball makaraang pagbabarilin ng hindi nakilalang salarin sa loob ng basketball court sa Caloocan City kamakalawa ng hapon.
Agad na nasawi dahil sa tama ng bala sa ulo at katawan ang biktimang nakilalang si Ronald Bumatay, alyas “Dagul”, 24, ng No. 193 Mascar-do Street, Brgy. 143 Bagong Barrio, ng naturang lungsod.
Sa inisyal na ulat ng Caloocan City Police, naglalaro ng basketball ang biktima dakong alas-4:54 ng hapon nang lumapit sa kanya ang nag-iisang salarin na nakasuot ng puting kamiseta, itim na sombrero at maong shorts saka pinagbabaril ng malapitan ang biktima.
Nagkanya-kanyang takbuhan naman ang mga kalaro ni Bumatay kaya malayang nakatakas ang gunman sa hindi mabatid na direksyon.
Narekober ng pulisya ang dalawang bala ng hindi pa mabatid na kalibre ng baril. Nagsasagawa naman ng follow up operation ang pulisya.
- Latest