Ex OFWs, itinumba ng riding-in-tandem
MANILA, Philippines - Isang bala ng baril sa ulo ang tumapos sa buhay ng isang dating Overseas Filipino Worker (OFW) nang barilin habang abala sa pagkukumpuni ng motorsiklo, sa Sta. Cruz, Maynila, kamakalawa ng gabi.
Dead-on-the-spot ang biktimang si Hernani Icban, may live-in partner, at residente ng no. 1715 Oroquieta St., Sta. Cruz, Maynila.
Sa ulat ni PO2 Dennis Turla ng Manila Police District-Homicide Section, da- kong alas-11:20 ng gabi nang barilin ang biktima sa harap ng kanyang bahay habang abala sa pagkukumpuni ng motorsiklo.
Ayon sa live-in partner nito na si Niña Jessica Sumook Angeles, lumabas ng bahay si Icban upang ituloy ang kanyang inaayos na motorsiklo habang siya ay abala naman sa pagpapa-tulog ng kanilang 2 buwang gulang na sanggol.
Makaraan ang ilang minuto, narinig ni Angeles ang pagkakagulo sa labas ng kanilang bahay at may nagsabi sa kanya na binaril ang biktima.
Dito na nakita ni Angeles na nakabulagta at naliligo sa sariling dugo ang biktima.
Ilan sa mga nakakita ang nagsabi na dalawang lalaki na magka-angkas sa motorsiklo at nakasuot ng jacket ang lumapit at isa ang bumaril sa biktima.
Sinabi naman ni Angeles na wala naman siyang alam na kaaway ni Icban.
Nagsasagawa pa rin ng follow up investigation ang pulisya sa kaso.
- Latest