Obrero tumba sa suntok ni kuya
MANILA, Philippines – Patay ang isang 23-anyos na construction worker nang pagsusuntukin ito ng kanyang kuya makaraang magtalo dahil sa kanilang trabaho kahapon sa Taguig City.
Dead on arrival sa Mandaluyong Medical Center ang biktimang si Jerick Suarez, ng Miranda St., Zone-2, Brgy. Central Signal Village, Taguig City, nagtamo ito ng matinding pinsala sa ulo.
Samantalang ang kuya naman nitong si Jayson Suarez, 26, isa ring construction worker, ay nasa custody ngayon ng pulisya at inihahanda na ang kasong isasampa laban dito.
Base sa report na natanggap ni Senior Supt. Ramil Ramirez, hepe ng Taguig City Police, naganap ang insidente alas-11:20 ng umaga sa pinagtratrabahuhan ng magkapatid sa Menarco Tower Project Staging Area sa panulukan ng 9th at 11th Sts., Bonifacio Global City (BGC), Brgy. Fort Bonifacio ng naturang siyudad.
Nabatid na kasalukuyang nagtatrabaho ang magkapatid nang sitahin ng suspect ang nakababatang kapatid na may kaugnayan sa kanilang trabaho na humantong sa mainitang pagtatalo.
Sa sobrang galit nang suspect, pinagsusuntok nito ang nakababatang kapatid hanggang sa tinamaan ito sa panga at matumba at mawalan ng malay.
Dali-daling isinugod ang biktima ng kanyang mga kasamahan sa trabaho sa naturang ospital, subalit idineklara rin itong DOA, samantalang ang kuya naman nitong si Jayson ay kaagad dinala sa himpilan ng pulisya.
- Latest