Fil-Am murder suspect pinabalik ng Pinas
MANILA, Philippines - Pinatapon na pabalik sa Pilipinas ang Filipino-American na suspek sa brutal na pagpaslang sa isang dalagang bestfriend ng kaniyang misis, na nadiskubreng sunog ang bangkay, nakagapos ang mga kamay at paa at maraming tama ng bala sa ulo sa Sto. Tomas River, Maculcul Bridge, Barangay Malicmot, San Felipe, Zambales noong Hulyo 25, 2015.
Ineskortan ng mga tauhan ng Federal Bureau of Investigation (FBI) pabalik ng bansa ang suspek na kinilalang si Jonathan Dewayne Ciocon Viane sa bisa ng extradition request sa US government ng pamahalaan at kasamang sumundo ang NBI-Interpol Division sa Los Angeles California. Dumating sila sa Ninoy Aquino International Airport (NAIA) noong nakaraang Linggo.
Si Viane ay kapwa akusado ng naarestong suspek na si Niño Dela Cruz, sa kasong murder na isinampa ng mga kaanak ng biktimang si Karieces De Dios Mojica, alyas Aika.
Nabatid na noong Agosto 18, 2015 ay nag-isyu ng warrant of arrest laban kay Viane si Judge Consuelo Amog-Bucar ng Branch 71 ng Regional Trial Court ng Iba Zambales matapos iakyat sa korte ang kasong murder na walang inirekomendang piyansa.
Nabatid na noong Pebrero 29, 2016 nang aprubahan at sertipikahan ng US District Court for Southern District of Iowa na extraditable si Viane sa kasong murder na naganap sa Pilipinas, ipinaalam agad ito ng Department of Justice (DOJ) sa NBI-International Operations Division (NBI-IOD) nang ipaalam naman ng United States Department of Justice Attache sa Manila.
Lumalabas na si Viane ang pangunahing suspek o utak sa pagpatay kay Mojica, dahil ito ang huling nakitang kausap ng biktima bago ito natagpuang patay.
Kaibigan umano ng maybahay ni Viane si Mojica at ito ang gumagawa ng paraan para madala sa US ang 4-na taong gulang na anak ng mag-asawa at tagasumbong umano kung ano ang ginagawa ng suspek sa PIlipinas.
- Latest
